قلوب الناس ماتت.. 15 سنة مصير قاتلة ابنتها فى النيل.. المتهمة تستقبل القرار بـ"ضحكة" صادمة.. شقيقة القتيلة: ماما رمت أختى في المياه وحاولت ترمينى وراها.. الأهالي أنقذونا من الموت ولا أنسى آخر مشهد لأختي

15 سنة مشدد، عقوبة قررتها المحكمة لقاتلة طفلتها في القاهرة بعد القائها في النيل، حيث أسدلت محكمة جنايات القاهرة برئاسة المستشار عبد الحميد همام، وعضوية المستشارين محمود رشدان وعبد الله سلام وحضور سامح عليان، الستار قضية هزت المجتمع المصرى، بمعاقبة المتهمة بقتل طفلتها الرضيعة بإلقائها في النيل من فوق كوبرى قصر النيل ومحاولة قتل طفلتها الثانية، بالسجن المشدد 15 سنه، حيث استقبلت القاتلة القرار بـ"ضحكة" صادمة وشرب المياه.

وكشفت نصوص التحقيقات التي حصل "اليوم السابع" عليها، عن اعترافات صادمة للمتهمة، حيث قالت: اللى حصل انى  اتجوزت 3 مرات وأول مرة وانا عندى 19 سنة ومخلفتش في الجوزاتين واتجوزت مرة ثالثة من إبراهيم في 2012 وخلفت منه بنتى امارة في 2013 وكنا ساكنين عنده في دمياط بس حصل مشاكل ماديه وروحنا قعدنا في شقة بتاعت ابويا في بلقاس وجوزى مكنش بيدفع ايجار الشقة لابويا ،وكان بيطلب من ابويا فلوس يصرف بيها علينا ، فحصلت مشاكل كتير بينا وانا كنت حامل في بنتى أمينه، وبعد كده جوزى طلقنى وأنا حامل في بنتى التانية ومكنش معايا فلوس خالص اصرف منها اصرف بيها على ولادى، وجوزى مكنش بيصرف عليا وانا نفسيتى تعبت جدا ومكنتش قادرة استحمل وفى اخر الشعر بدأت تدور فكرة في دماغى أنى اقتل بناتى وانتحر بس معرفتش انفذ الفكره ، لحد يوم الحادث انا خرجت من بيتنا وكان معايا بنتى اماره وبنتى امينه وكنت واخدة من ابويا 400 جنيه عشان اشترى هدوم للعيال.

وتابعت" وركبت الميكروباص أنا والبنتين وقررت أروح مكان بعيد وارمى بنانى في المياه وارمى نفسى عشان اخلص من حياتى وركبت قطر تانى وروحت دمياط بس حسيت أنى عايزة أروح مكان محدش يعرفنى فيه، وبعدها ركبت القطر تانى وروحت بيه مصر ووصلت محطة مصر وركبت ميكروباص وصلت عند كوبرى قصر النيل، ووقفت شوية اشوف في حد على الكوبرى وروحت رميت بنتى الر ضيعة في النيل وجيت ارمى بنتى التانية بس مسكت في السور وقعدت تصرخ وانا حاولت انتحر وفقدت الوعى ولقيت نفسى في القسم ".

وكشفت التحقيقات عن أسرار جديدة في القضية، على لسان طفلة المتهمة الناجية من تلك الجريمة البشعة التي تدعى "أماره " 8 سنوات حيث قالت في تحقيقات النيابة " اللى حصل ان ماما خدتنى امبارح انا وامينه اختى وقالتلى اننا رايحين نشترى ملابس من شربين، وربكنا القطر من بلقاس وغيرنا القطر مرتين، وخدنا عربيه ونزلنا عند النيل وماما شالت امينه على كتفها ومسكتنى في ايدها ومشينا على كوبرى وفجأة في نص الكوبرى ماما رمت امينه في المياه ، ومسكتنى وكانت عايزة ترمينى فى الميه، بس انا خوفت ومسكت في سور الكوبرى وحاولت ماما ترمى نفسها في النيل، وكان في راجل شدنى وشد ماما والناس اتلمت وودونا البوليس.

وشهد الطالب الذى انقذ الطفلة الثانية من الموت عقب قيام المتهمة بمحاولة القائها في مياه النيل اعلى كوبرى قصر النيل " اللى حصل انى كنت خارج حوالى الساعة 9 مساء، وكنت بتمشى على كوبرى قصر النيل رايح ناحية ميدان التحرير، وشوفت واحدة ماشية جاية من ناحية التحرير وكان معاها بنت رضيعة على كتفها وبنت صغيرة مسكاها في ايدها وكانت ماشيه بتبصلى جامد فانا ركزت معها لقيتها وقفت حوالى نص ساعة في نص الكوبرى وفجاة لقيتها بترمى البنت الرضيعة في مياه النيل وبتشيل البنت التانية اللى كانت ماشيه جنبها وبتحاول ترميها في النيل فجريت عليها ومسكت البنت الصغيرة وشدتها منها لقيت المتهمة رمت الشنطه بتاعتها وبتحاول ترمى نفسها في النيل من فوق الكوبرى روحت شدتها من ايدها واغمى عليها .