راجي بشاي يكتب : الهبيدة و آمال ماهر .. لماذا آمال ماهر الآن؟

دون الدخول فى تفاصيل الحياة الخاصة:
نصرمحروس/شيرين
نصرمحروس/بهاء سلطان
معرفش اسمها اية /محمد شرنوبى
كل هؤلاء وغيرهم بيمضوا عقود للمنتجين بشروط وبيقبضوا وعند مخالفة العقود صاحب الحق بيتحرك للحفاظ على حقة والاخبار مليئة يوميا بالنزاعات القضائية من هذا النوع .
آمال ماهر بقى مضت مع تركى ال شيخ وده وزير سعودى وبينها وبينة مشاكل تعاقدية كانت سبب لمنعها تعاقديا او حتى نزول اغانيها على المنصات الرقمية .. موضوع بيحصل وهيحصل كل يوم .
ليه آمال ماهر تريند في الفترة الوجيزة السابقة: لأن المملكة دخلت فى استثمارات مع مصر (ما يقرب من ٣٠ مليار دولار) مقسمة علي مراحل ودة ضرب تريند آخر اسمة مفيش استثمارات فى مصر .
الحلوين إياهم بتوع السم في العسل نزلوا خبر عن امال ماهر انها مسجونة وبيعذبوها وبينكحوها والداخلية عملاها مروحة فى السجن وخلاص من كتر التعذيب دخلت المستشفى بين الحياة والموت واللى سرب الخبر ظابط فى السجن للحبكة الدرامية علشان الدم يضرب فى نافوخك وتجيب سيرة تركى آل شيخ بالغلط وندخل فى ملاسنات مع المملكة ودة المطلوب بالظبط
كل تريند خايب وانتوا بخير وخليكوا كدة حصالة للاخوان تجيب فيكم اجوان زى مايحبوا .. علي فكرة كل ما تلاقوا الكائن اللزج ال self employed منزل بوست من دول اعرفوا السم جاي منين
حد.يسأل مين الكائن اللزج ده: ده أحد أكبر الخلايا النائمة و عامل فيها إنه وطني بس هنقول ايه .. مفيش خروف يعرف يداري ليته و لا يداري ريحتها!!
اتعلموا مفيش تريند بيسمّع الا وراه تنظيم بيصرف وعندة صفحات وحسابات مضروبة لدرجة إن صفحة راقاصات وليها متابعين كتير نزلت بوست امال ماهر ياحرام واما محمد مرسي لما مات نزلوا شتيمة!
الصفحات و الحسابات المضروبة كتييييير أوي .. زي ما اتكلمنا مع بعض في مقال الشهر الماضي .. فعلا: صياحهم طرب في سجنهم الافتراضي وراء الكيبورد!!
واحدة بمحض إرادتها إتجوزت واحد شافته كنز ثروات، هبشت منه ملايين وهدايا عمر أهلهم ما سمعوا عنها.
إختلفت معاه .. أياً كان اللي حصل إطلقت.
زيه زي أي راجل معاه ثروات بالحجم ده .. صعب عليه إنه يترفض - مسكتش -هو عامل معاها عقد وقعته بمحض إرادتها فيه شرط جزائى خمسين مليون دولار! يمنعها من الغناء بغير بمعرفته ..قام نفذه.
معاها تدفع وترجع تغني كان بها.. احتمال تكون شافت إن الفلوس معاها احسن من الشغل بلا وجع قلب ..
السؤال يبقي شويه هبيدة كحيانه لاحضرت جوازهم ولا طلاقهم ولا حد يعرفهم ولا عارفين ينطقوا إسم القرية السياحية اللي هي قاعدة فيها بتصيف ! ولو راحوا مش هيدخلوهم!
ولا يقدروا يستوعب يعني ايه حد يجيب لواحدة طيارة هدية!؟ لإن اخر طيارة جاتلهم أُم ديل وكانوا بتطيروها من فوق سطوح بيتهم !
يبقي ايه االي حشرهم فى الموضوع وفالقينا هاشتجات #امال_ماهر_فين لييييه ؟!
و عمالين ينفخوا في الرماد و يشتموا هنا و هناك عشان يحصل تلاسن و شد وجذب بين مصريين و سعوديين و ده اللي كاااااان بيحلموا بيه!
و آخر هبده لا دى مش امال ماهر لو امال ماهر خلوها تطلع تغنى لنا لايف مش فيديو متسجل !!
طيب اهى طلعت لهم مع رامى رضوان وغنت لهم طوبة فوق طوبة وابنى .. واعلنت عن حفلة و غنت فيها زي ما هنتكلم مع بعص وقالت انها كويسة وضحكت وهزرت وقالت لحسن يقولوا عليا دى مش هى !!!
السادة خبراء لغة اللايف والمقامات الغنائية.....حتسمعونا ايه من تحليلات ؟!
متهيألى طالما غنت طوبة على طوبة ...يبقى بتستغيث ...لو كويسة كانت غنت اغنية لو كان بخااااطرى انا 
بصراحة الموضوع سخف وبووخ...والمستفيد الاول من الهرى ده هى الفنانة اللى فيه عشروميت مليون واحد مشغولين عليها اكتر من انشغالهم باحوالهم ونفسهم واهلهم او بلدهم حتى !
على اى حال ....هم فلقونا وكانوا بيقولوا بانها متعذبة ومحبوسة ومسحولة وفى غيبوووبة !
فى واحدة حتطلع من غيبوبة تغنى بذمتكم يا هبيدة ؟!
أهي غنت و أطلت و أبدعت ( آمال ماهر ) وسط حضور جماهيرى كثيف إللى مشتاق لصوتها الجميل فى حفلها أمس بالعلمين و غنت كما لم تغنى من قبل و بدأتها بأغنيتها ( طوبه على طوبه ) الوطنية الجميلة .
كانت ليله صيفية جميله فيها الإبداع و الموهبه و التنظيم و التألق سواء من الجمهور أو ( آمال ماهر ) التى كانت كالفراشه على المسرح و هى تغنى من فرط سعادتها .
من ناحية تانية المستشار كان بيتحرق من القهر فكتب جمله عن فشل الحفل و ( وزعها ) على كل المواقع السعودية و المواقع العربية التى تساهم فيها السعودية بالأموال لنشرها هى هى دون تغيير حرف منها على كل المواقع التابعه له
معلش الشياط بيعمل أكتر من كده !!
المهم إن ( آمال ماهر ) عادت لعشقها الغناء و نحن عدنا لنستمع بصوتها الجميل الرائع و مزيد من الحفلات لبنت مصر الجميلة صاحبة أجمل و أقوى و أعذب صوت موجود على الساحه الغنائية.
الخلاصة في جملتين: متجريش وراء هبد السوشيال ميديا و إقرأ كثير من مواقع محترمة عشان تتأكد من صدق الخبر و متشيرش أي خبر علي صفحتك إلا لما تتأكد من أكثر من مصدر موثوق و أخيرا إحذروا الصفحات اللي بتدس السم في العسل و أكيد فهمتوا مين اللي وراهم و بيمولهم.