أيدي تُروح على النِمرة بقلم الشاعرة سارة عبد الرحمن صاحبة ديواني أوضتين وسارة و أنا سارة يله

وأيدي تُروح على النِمرة
وأَقُول يِمكن ده يِطلع حِلم
وخايفه كأني ف مُغامرة
وصاحبتها ماتت فِ الفيلم!
طِلع مُوت الصُحاب أَصعب
من إني أوصِفه ف أَبيات
بَشاعة صَدْمِتُه بِتِرْعِب
مُجرد قُول ده صَاحبك مَات????
بِتِلْقَى الكُون بِيتْحَرك
مع إنك لِسه ف مَكانك
وفَاكر الناس دِي بِتْهَرَج؟
وكام كِلمة عَلى لِسَانك
مُصِّرة لِرَفض صُوت العَقْل
وصُوت القَلب بِيعيط
ووقت المَشي تِحس بِتُقْل
وروحك طَالبة تِتْخيَط
وتِتْشَاهد وبِتْجَاهِد
بِنَفْسَك تِحْتِمي فْ أحضان
وتِتْعَاهِد مع الزَاهد
فِ شَخصك تِقْفِلوا البِيبان
وتِبْدَأ تَسْتَعِيد الوَعي
بِذكر الله  وكَام آيه
تِوَاصِل جُهد وَقْت السَعي
وتِرْفُض تِبْقَى دِي نِهاية!
صُداع على زَغْلله ف العِين
واعراض إنسحاب فِ الروح
صَدِيقة عُمْر ف غَمضة عِين
تِقَرَر تِخْتِفي وتْرُوح!
حبيبتي.. عارفه سامعاني
مسامحاني على التقصير!
وعِزة رَبي أنا بَعاني
ووجعي عَليكي والله كِبير
ووعد عَليَّا أدعيلك
وطُول ما انا عَايشه فَاكراكي
وعُمري ماهنسى تَحفِيلك
وضِحْكِك حتى ف بُكاكي
وعارفه اللي مِهَوِنها
كلامي مع رحاب عنك
برائتك فينا دافننها
وكل جميل صَدر مِنك
ماقولتيش.. اتصل بيكي؟
وهل يِنفع و هتردي؟!
ولو كان صعب..ده عليكي
فمَتْهِزِيش..أمل عَندي????
و أرجوكي.. لا مترديش ????