صور.. "مها" راحت المستشفى تعمل قلب مفتوح وهى سايقة ومبتسمة وخرجت من العمليات فى غيبوبة.. بقالها 25 يوم فى العناية المركزة.. وشقيقها: مش حاسة بينا ولا بالدنيا ومفيش حد بيفهمنا حالتها.. وأناشد وزارة الصحة التدخل

كتبت فاطمة ياسر

"أنا كل اللي عاوزه أفهم أختي جرالها إيه بالضبط..بقالها 25 يوما في العناية المركز ومش فايقة ولا حاسة بينا ولا بالدنيا.. ومفيش ولا دكتور في المستشفي بيفهمنا حالتها.. أختي دخلت المستشفي في شهر 2 على رجلها ورايحة لحد المستشفى سايقة عربيتها ودلوقتي عندها  مشاكل في القلب والصدر والمخ، ومش بس كدة، ده لما تفوق من الغيبوبة  بإذن الله هتحتاج تأهيل للمشي والكلام والذاكرة نتيجة للمضاعفات إللى حصلت في المخ، دة إهمال وخطأ طبي فادح حصل أثناء أو بعد العملية، أو من المستشفى اللي المفروض أنها اكبر مستشفى فى مصر"... 

بهذه الكلمات شرح الدكتور محمود شلتوت شقيق حالة الدكتورة "مها"، التي أجرت عملية قلب مفتوح يوم 20-2-2018 وإلى يومنا هذا في العناية المركزة، ولم تفق منذ خروجها من غرفة العمليات، دون معرفة السبب الحقيقي وراء ذلك، فكل يوم هناك أقاويل حول الحالة، سواء كان من المستشفى أو الأطباء.

يروي "محمود" لـ "اليوم السابع" القصة قائلا: "مها" شابة في مقتبل عمرها، فهي دكتورة بيطرية، يرتسم علي وجها النقاء وحب الحياة والبراءة،  يتمية الأم والأب، عمرها لم يتجاوز الـ25 عاما، شعرت بتعب قلبها، وذهبت للطبيب واكتشفت أنها تعاني من ارتجاع في الصمام المترالي بالقلب، وتحتاج لعملية قلب مفتوح، ذهبنا لطبيب آخر وأكد نفس الكلام".

ويضيف:"اتجهنا لدكتور شهير في جراحة القلب، وأعطاها بعض الأدوية لتهيئتها للعملية، وبالفعل التزمت أختي بالعلاجات قبل العملية بشهر، ودخلت المستشفي قبل العملية بيومين أي 18-2-2018،  للاطمئنان عىي حالتها وإجراء بعض التحاليل والأشعات، وكانت الحالة كويسة".

ويكمل "محمود": " دخلت مها لغرفة العمليات وهي مبتسمة وسعيدة ومقبلة على الحياة يوم 20-2-2018، الساعة 9 صباحا إلى 4 عصرا،  وخرجت منها على العناية المركز لحد يومنا هذا، ومش على غرفة الإفاقة لأنها مافقتش بعد البنج من يومها، ومحدش راضي يقولنا الأسباب ولا المضاعفات ولا أي حاجة عنها، مع إن الدكتور الجراح أكد أن العملية نجحت وهي هتقعد 24 ساعة في العناية وبعد كدة هتتنقل غرفتها لمدة أسبوع، بس دة محصلش".

وتابع:"مها في غيبوبة ومش عارفين سببها ولا عارفين مش بتفوق ليه؟.. وكل ما نسأل دكتور يقولنا "دي مضاعفات عادية ومجرد inflammatory response بعد عملية القلب المفتوح"، وبيقنعونا أن الحالة مستقرة طب إزاي وهي مش فايقة،  وبعد الفحوصات والأشعات الأخير وهي في العناية  طلع تقرير ان في تدهور في درجة الوعي وارتجاع في الصمام المترالي إللي هي دخلت العملية عشانه".

وأوضح محمود، :" إنه بعد الإصرار على معرفة سبب غيبوبة مها،  طلع أول تقرير  من المستشفى بيقول ان في lateral cerebral and cerebellar foci of brain ischemia، يعني مفيش دم واصل للمخ مع إصرار شديد من دكاترة العناية ان دي نتيجة جلطات متفرقة في المخ، مع اننا عرضنا اشعة المخ على أكبر استشاريين مخ واعصاب في القاهرة واسكندرية وكلهم بلا استثناء أكدوا ان الحالة دي سببها intra or post operative hypoxia ، يعني نقص اكسجين اثناء العملية او بعدها اثناء الافاقة يعني خطأ طبي كبير".

واختتم محمود: "عرضنا افلام الأشعة والتقارير على أكبر استشاريين في مصر وكلهم قالوا ان في تعارض بين افلام الاشعة من اول يوم في العناية وبين التقارير المكتوبة اللي طالعة من المستشفي، ويوم 13/3 اتحطت  أختي تحت العزل الطبي نتيجة لعدوي بكتيرية شديدة اخدتها من العناية المركزة،  ولما اتعملها اختبارات حساسية للمضادات الحيوية طلعت كلها resistant يعني مفيش اي مضاد حيوي ينفع معاها وفي افرازات كثيفة جدا عالصدر،  وده الاخطر  بالإضافة لوجود تضخم في عضلة القلب وارتجاع في الصمام المترالي والاورطي"، وطالب محمود وزارة الصحة بالتدخل ونقل شقيقته من المستشفى.

يذكر أن "محمود شلتوت" قدم بلاغا ضد المستشفى حمل رقم  1324 قسم شرطة أول أكتوبر  في تاريخ 13-3-2018.